على الربابة (أحمد فؤاد نجم)

[د//نون]

<font face="Simplified Arabic" font size="4" color="#8800CC">
أصلّي ع النبي قبل البداية
نبِيْ عربي مشفّع فى البرايا

واسلّم بالوتر والقوس عليكم
ياكُلّ السائرين ع الشوك معايا

يقول الشاعر المجروح فؤاده
من الأندال ومن دقّ الرحاية

غرامي بالحروب يسبق كلامي
وآملي فى الشعوب يخلق غَنايا

وعشقي للكلام غالب سكوتي
وكرهي للسكات جالِب شقايا

يقول ابن العرَب والجرح نازف
صديد الذل ودموع السبايا

ونار الغلّ من أيلول ويونيه
وريق المرّ من طعم الرزايا

رضانا بالقليل والخوف رمانا
لحكام المواكب والهفايا

وبيع الأرض بالعرض لعدوّي
على عينك يا تاجر فى المرايه

**
يا شعب العرَب يا ابن الفوارس
يا رافع للنضال بيرق وراية

يا واهب للزمن أيام وضيَّة
بنور البذل والجود والعطايا

صلاح الدين ينادي من منامته
على النايمين على دمِّ الضحايا

لاأنا منكم ولا إنتو من ولادي
إذا رضيتم بغير النصر غاية

ولا غير السلاح فى الحرب يحكم
ويحسم فى المشاكل والقضايا

1973