سؤؤؤؤؤؤؤؤؤؤال

[ريم الفلا]

مين يعرف واحد علامة يدينى فتوى اى كلام؟

لو حجيت للبيت الابيض يلزمنى البس احرام؟

يلزم برضة اقصر شعرى والبى تلبية الاسلام؟

فتوى على مذهب خنشر لما اطوف الاشواط كام؟

وفيه رخصة لميوهى الساخن لوكانت مونيكا قدام؟

عايز اقوى مخنشر فيهم واحد م الفقها الاعلام

ليه زعمائنا يحجوا فرادى مش بالذمة يبقى حرام؟

ذنب كفاية يكفروا عنه بدم الشعب او الاغنام

والسعى فى بروكلين اربح ويهرولوا حى الاجرام

والتضحية فى القدس اكيد باولاد الاقصى الايتام

طب يا مخنشر امتى العيد لو حجينا طول العام؟

بعد ما باس العبد الايد كله يعيد فى الاوهام

طب وعيلنا يعيدوا فين فى الجيزة ولا الاهرام؟

خنشر قال الزحمة حرام والخلطة بتعمل اورام

كل ما فيكم يلزم بيته ونجيب له الجنة فى افلام

بس حبيب امريكا برحته تحت حماية الامن العام

قلت يا خنشر دانت ضلالى تستاهل تاخد اعدام




عزت عفيفى قطب