هـذا أنــــــا

[ريم الفلا]

<DIV align=justify><FONT face= Tahoma fontsize=5 color=blue face=



هذا أنا .. منهو أنا؟
هم وحزن
شوق وعنا
أطوي مسافات الطريق
أدوّر لنفسي رفيق
أحيا معه لحظة هَنَا


تغيب الشمس في عيوني
وفي قلبي
ويبكي من عناي الليل
وأمسح دمعه ودمعي
وعلى كفّـي بكى المنديل


بيني وبين العذاب حالة عشق
ما نفترق
لو كان ودّي نفترق
غصب عن عيون الفرح
أصبح حبيبي
وغصب عن عيون الحزن
أمسي حبيبي
لو كنت أثق فيه .. أو ماأثق فيه
حالة عشق


أحمّـل الهم الحروف ..
يمكن تشوف
يمكن تحس إن الألم يأس وخوف
حتى القلم
ماعاد لي صاحب عطوف
لكني ارجع له واقول:
كلي عذر .. كلي عذر


في دنيتي غير العذاب
ماشفت فيها شي
ميّت ولكن للاسف
ميّت بصورة حي
حتى الأمل .. وين الأمل؟
اللي حسبت انه صديق
ما زارني يوم وسأل..
وين الأمل؟ هل هو رحل؟
أو يوم وافاه الأجل؟
أو من سما عمري أفل؟
اسأل .. وأدوّر عن جواب
واصادف عيون السحاب
تبكي واسألها وتقول:
(مات الأمل .. مات الأمل)


سهرت بعيون الكفيف
أبحث عن خيوط الفجر
أو نور من خذ البدر
ما شفت الا وحدتي
والليل يكتب غربتي
وين التفت .. القى الظلام
يوقف بآخر نظرتي
والشمس باحضان البحر
نامت ولو تصحى قهر
تشرق على كل العيون
لكن بعيني تنتحر


هذا أنا
ما بين عمري والهنا
مثل الذي
بين الدياجي والسّنا
منهو أنا؟
إسأل
يجاوبك العَنا:
هذا أنا
هذا أنا





(عبدالرحمن بن حاشر)